pakachandrike ಪಾಕಚಂದ್ರಿಕೆ

ಕೊಡಕ್ಯನ ಅಥವಾ ಮಜ್ಜಿಗೆ ಹುಳಿ

2012-01-31T07:23:00.000-08:00

ಕೊಡಕ್ಯನ ದಕ್ಷಿಣ ಕನ್ನಡದ ಪದಾರ್ಥ ಅಂದರೆ ಮೇಲೋಗರ. ಕೆಲವೆಡೆ ಇದನ್ನೇ ಮಜ್ಜಿಗೆಹುಳಿ ಎಂದೂ ಕರೆಯುತ್ತಾರೆ.

ಸಾಮಾನ್ಯವಾಗಿ ಇದಕ್ಕೆ ಬಳಸುವ ತರಕಾರಿಗಳು ಜೀಹಲಸಿನಕಾಯಿ (ಜೀಕುಜ್ಜೆ), ಮಂಗಳೂರು ಸೌತೆಕಾಯಿ, ಬೂದು ಕುಂಬಳಕಾಯಿ, ತೊಂಡೆಕಾಯಿ.

ಮಾಡೋದು ಬಹಳ ಸುಲಭ. ಯಾವುದೇ ಅಬ್ಬರವಿಲ್ಲದ ಮೇಲೋಗರವಿದು. ಅದಕ್ಕಾಗಿಯೇ ಹೇಳಿದ್ದು ಇದು ಸರಳ ಜೀವಿ.

ಮಾಡುವ ವಿಧಾನ :
ತರಕಾರಿಯನ್ನು ಸಣ್ಣದಾಗಿ ಹೋಳು ಮಾಡಿಕೊಳ್ಳಬೇಕು. ಸಣ್ಣದೆಂದರೆ ಸಿಕ್ಕಾಪಟ್ಟೆ ಸಣ್ಣದಲ್ಲ, ಕೊಂಚ ದೊಡ್ಡದಾಗಿರಲಿ. ನಂತರ ಅದನ್ನು ಬೇಯಿಸಲು ಒಲೆಯ ಮೇಲಿಡಬೇಕು. ಸಿಕ್ಕಾಪಟ್ಟೆ ನೀರು ಹಾಕಬೇಡಿ, ತರಕಾರಿ ಮುಳುಗಿದರೆ ಸಾಕು. ಮೆಲ್ಲನೆಯ ಉರಿಯಲ್ಲಿ ಉರಿಯುವಾಗ, ಎರಡು ಕುದಿ ಬಂದ ಮೇಲೆ ಒಂದೆರಡು ಹಸಿಮೆಣಸನ್ನು ಸೀಳಿ ಹಾಕಿ. ಅದಷ್ಟೆ ಖಾರ. ಆಮೇಲೆ ತೆಂಗಿನಕಾಯಿಯನ್ನು ತುರಿದಿಟ್ಟುಕೊಳ್ಳಿ.

ಸ್ವಲ್ಪ ತೆಂಗಿನಕಾಯಿ ಜಾಸ್ತಿ ಬೇಕು. ಇದಕ್ಕೆ ಬೇರೇನೂ ಹಾಕುವುದಿಲ್ಲ. ತುರಿದ ತೆಂಗಿನಕಾಯಿಗೆ 15-20 ಕಾಳು ಜೀರಿಗೆಯನ್ನು ಹಾಕಿ ಅರೆಯಿರಿ. ಬಹಳ ನುಣ್ಣಗಾಗುವುದು ಬೇಡ, ಅದರರ್ಥ ಬಹಳ ಗಜಿಗಜಿಯಾಗಿರಲೂ ಬಾರದು. ತರಕಾರಿ ಬೆಂದು ಮೇಲೆ, ಸ್ವಲ್ಪ ಉಪ್ಪು ಹಾಕಿ ಒಂದು ಕುದಿ ಬರಿಸಿ. ಆಗ ತರಕಾರಿ ಹೋಳುಗಳು ಉಪ್ಪಿನ ಸ್ವಾದವನ್ನು ಹೀರಿಕೊಳ್ಳುತ್ತವೆ. ನಂತರ ಅರೆದ ಕಾಯಿಯನ್ನು ಹಾಕಿ ಸೌಟಿನಲ್ಲಿ ಕಲಸಿ. ಬಳಿಕ, ಸ್ವಲ್ಪ ಮೊಸರು ಅಥವಾ ಮಜ್ಜಿಗೆ ಹಾಕಿ ತಿರುಗಿಸಿ. ಮಜ್ಜಿಗೆ ಅಥವಾ ಮೊಸರು ಹಾಕಿದ ಮೇಲೆ ಕುದಿಸಬಾರದು.

ಒಗ್ಗರಣೆ :
ಇದಕ್ಕೆ ಮೂರ್ನಾಲ್ಕು ಹನಿ ಕೊಬ್ಬರಿ ಎಣ್ಣೆ ಹಾಕಿ ಬಿಸಿ ಮಾಡಿ. ಅದಕ್ಕೆ ಒಂದೆರಡು ಕರಿಬೇವಿನ ಎಲೆ, ಒಂದೆರಡು ಜೀರಿಗೆ ಹಾಕಿ ಕಾಯಿಸಿ ಒಗ್ಗರಣೆ ಕೊಡಿ. ಅಲ್ಲಿಗೆ ಮಜ್ಜಿಗೆ ಹುಳಿ ಸಿದ್ಧ.

ಕೊನೆಗೊಂದಿಷ್ಟು ಟಿಪ್ಸ್ :
* ಇದಕ್ಕೆ ಕೆಲವರು ತೆಂಗಿನಕಾಯಿಯನ್ನು ರುಬ್ಬುವಾಗ ಸ್ವಲ್ಪವೇ ಸ್ವಲ್ಪ (ಹತ್ತು ಕಾಳಿನಷ್ಟು) ಕಡ್ಲೆಬೇಳೆಯನ್ನು ಕೆಂಪಗಾಗಿಸಿ ಸೇರಿಸಿ ಅರೆಯುತ್ತಾರೆ. ಆಗ ಮಜ್ಜಿಗೆ ಹುಳಿಗೆ ಒಂದು ಬಂಧ (ಸ್ವಲ್ಪ ದಪ್ಪಗೆ) ಬರುತ್ತದೆ.
* ಕಡ್ಲೆಬೇಳೆಯನ್ನು ಸೇರಿಸಿದರೆ ಹುಳಿಯೇನೋ ದಪ್ಪಗಾಗುತ್ತದೆ, ಆದರೆ ಅದರಲ್ಲಿ ತೇಜಸ್ಸು (ವೇಗ) ಇರುವುದಿಲ್ಲ.
* ಮೇಲೆ ಹೇಳಲಾದ ತರಕಾರಿಗಳಲ್ಲೇ ಬಿಸಿಗೆ ನೀರು ಬಿಡುವ ಗುಣವಿರುವುದರಿಂದ, ಮತ್ತಷ್ಟು ನೀರು ಹಾಕಿದರೆ ಪದಾರ್ಥ ನೀರು ನೀರಾಗುತ್ತದೆ. ತಿನ್ನಲು ರುಚಿಯಿರುವುದಿಲ್ಲ. ಹಾಗಾಗಿ ತರಕಾರಿ ಬೇಯಿಸಲು ಕಡಿಮೆ ನೀರು ಹಾಕಿ.
* ಇದಕ್ಕೆ ಕೊತ್ತಂಬರಿ ಸೊಪ್ಪನ್ನು ಹಾಕುವುದಿಲ್ಲ. ಕಾರಣ, ಹಸಿ ಜೀರಿಗೆಯ ಪರಿಮಳವೇ ಮಜ್ಜಿಗೆ ಹುಳಿಗೆ ಪ್ರಧಾನ.
* ಮಜ್ಜಿಗೆಯನ್ನು ಹಾಕಿದ ಮೇಲೆ ಕುದಿಸಿದರೆ, ಒಂದು ಬಗೆಯ ಒಗರು-ಕಹಿ ಬರುವ ಸಾಧ್ಯತೆ ಹೆಚ್ಚು.

ಐದು ಬಗೆಯ ಸೊಪ್ಪಿನ ಹುಳಿ

2010-06-21T03:20:00.000-07:00

ಸೊಪ್ಪಿನ ಹುಳಿ ಐದು ಬಗೆಯಲ್ಲಿ ಮಾಡಬಹುದು. ಹರವೆಸೊಪ್ಪು (ಕೀರೆ ಇತ್ಯಾದಿ ಹೆಸರುಗಳಲ್ಲೂ ಕರೆಯುತ್ತಾರೆ) ಬಳಸಿ ಅದ್ಭುತವಾಗಿ ಹುಳಿ ಮಾಡಬಹುದು. ಯಾವಾಗಲೂ ಸೊಪ್ಪಿನ ಹುಳಿ ಮರು ದಿನಕ್ಕೆ ಹೆಚ್ಚು ರುಚಿ ಎನಿಸುತ್ತದೆ.

ನಾಲ್ಕು ಮಂದಿಯ ಕುಟುಂಬಕ್ಕೆ ಎರಡು ಕಟ್ಟು ಸೊಪ್ಪು ಸಾಕು. ಸೊಪ್ಪನ್ನು ಮೊದಲು ಚೆನ್ನಾಗಿ ತೊಳೆದು ಕತ್ತರಿಸಬೇಕು. ನಂತರ ಬೇಯಲು ಒಲೆಯ ಮೇಲೆ ಇಡಿ. ಒಲೆ ಹಚ್ಚುವುದು ಗೊತ್ತೇ ಇದೆ. ಕೂಡಲೇ ಸ್ವಲ್ಪ ಅರಿಶಿನ, ಒಂದು ತುಂಡು ಬೆಲ್ಲ, ಸ್ವಲ್ಪ ಹುಣಸೇಹಣ್ಣು, ಕೊಂಚ ಉಪ್ಪನ್ನು ಹಾಕಿ. ನೀರು ಸ್ವಲ್ಪವಿರಲಿ.

ಬಹಳಷ್ಟು ಬಾರಿ ಉಳಿದ ತರಕಾರಿಗಳಂತೆ ಸೊಪ್ಪಿಗೂ ನೀರು ಜಾಸ್ತಿ ಹಾಕಿಬಿಡಬಾರದು. ಸೊಪ್ಪು ಬೆಂದಂತೆ ಕರಗುವ ಗುಣ ಹೊಂದಿದೆ. ಹಾಗಾಗಿ ಒಮ್ಮೆಲೆ ನೀರು ಜಾಸ್ತಿ ಹಾಕಿದರೆ ಹುಳಿ ಹೋಗಿ ಸಾರು ಮಾದರಿ ಆದೀತು.

ಮೊದಲನೇ ವಿಧಾನ

ಸ್ವಲ್ಪ ಸಾಸಿವೆ (ಎರಡು ಟೀ ಚಮಚ) ಹಾಗೂ ನಾಲ್ಕು ಒಣಮೆಣಸು ಹಾಗೂ ಸ್ವಲ್ಪ ತೆಂಗಿನಕಾಯಿ ಹಾಕಿ ನುಣ್ಣಗೆ ರುಬ್ಬಿ. ನಂತರ ಬೆಂದ ಸೊಪ್ಪಿಗೆ ಬೆರೆಸಿ. ಚೆನ್ನಾಗಿ ಕುದಿ ಬರಲಿ. ಇದು ಒಂದು ರೀತಿಯ ಹುಳಿ. ಸ್ವಲ್ಪ ಸಾಸಿಮೆಯ ಪರಿಮಳ ಬರುತ್ತೆ, ಚೆನ್ನಾಗಿರುತ್ತೆ.

ಎರಡನೇ ವಿಧಾನ

ಮೂರು ಚಮಚ ಕೊತ್ತಂಬರಿಕಾಳು, ಎರಡು ಚಮಚ ಜೀರಿಗೆ ಹಾಗೂ ನಾಲ್ಕು ಒಣಮೆಣಸನ್ನು ಒಟ್ಟಿಗೇ ಸ್ವಲ್ಪ ಹುರಿಯಿರಿ. ಜಾಸ್ತಿ ಉರಿಯಬೇಡಿ. ನಂತರ ಕಾಯಿಯೊಂದಿಗೆ ನುಣ್ಣಗೆ ರುಬ್ಬಿ ಬೆಂದ ಸೊಪ್ಪಿಗೆ ಸೇರಿಸಿ. ಚೆನ್ನಾಗಿ ಕುದಿ ಬರಲಿ. ನಿಮಗೆ ಬೇಕಾದಂತೆ ಅದಕ್ಕೆ ಸ್ವಲ್ಪ ನೀರು, ಉಪ್ಪು ಬೆರೆಸಿ.

ನಂತರ ಒಂದು ಗೆಡ್ಡೆ ಬೆಳ್ಳುಳ್ಳಿಯನ್ನು ಸುಲಿದು, ಅದನ್ನು ಕೆಂಪಗೆ ಕಾಯಿಸಿ ಒಗ್ಗರಣೆ ಕೊಡಿ. ಬಹಳ ಚೆನ್ನಾಗಿರುತ್ತದೆ, ಅದರಲ್ಲೂ ಒಂದು ದಿನದ ನಂತರ ಈ ಹುಳಿ ತಿನ್ನಲೂ ಬಹಳ ರುಚಿ.

ಮೂರನೇ ವಿಧಾನ

ಸೊಪ್ಪು ಬೇಯಿಸುವಾಗ (ಮೇಲಿನ ವಿಧಾನದಂತೆಯೆ ಬೇಯಿಸಬೇಕು) ಅದಕ್ಕೆ ಮೂರು ಹಸಿಮೆಣಸು ಸೀಳಿ ಹಾಕಿ. ಒಂದು ತುಂಡು ಶುಂಠಿಯನ್ನೂ ಸಣ್ಣದಾಗಿ ಕತ್ತರಿಸಿ ಹಾಕಿ. ಅವೆಲ್ಲವೂ ಚೆನ್ನಾಗಿ ಬೆಂದ ಮೇಲೆ ಒಂದು ಸಾಸಿವೆ ಒಗ್ಗರಣೆ ಕೊಟ್ಟು ಬಿಡಿ. ಜಾಸ್ತಿ ನೀರು ಹಾಕದೇ ಸ್ವಲ್ಪ ಗಟ್ಟಿ ಗಟ್ಟಿಯಾಗಿಯೇ ಇರಲಿ. ಇದನ್ನು ಸೊಪ್ಪಿನ ಗಸಿಯಂತಲೂ ಕರೆಯುತ್ತಾರೆ. ಚೆನ್ನಾಗಿರುತ್ತೆ. ಸೊಪ್ಪಿನ ಬೋಳುಹುಳಿ ಎಂತಲೂ ಹೇಳುತ್ತಾರೆ, ಇದಕ್ಕೆ ತೆಂಗಿನಕಾಯಿ ಹಾಕುವುದಿಲ್ಲ.

ನಾಲ್ಕನೇ ವಿಧಾನ

ಕೇವಲ ಮೂರು ಚಮಚ ಕೊತ್ತಂಬರಿ ಕಾಳು ಹಾಗೂ ಹಸಿಮೆಣಸನ್ನು ಹುರಿಯದೇ ಹಸಿಯಾಗಿಯೇ ತೆಂಗಿನಕಾಯಿಯೊಂದಿಗೆ ರುಬ್ಬಿ. ನಂತರ ಬೆಂದ ಸೊಪ್ಪಿನೊಂದಿಗೆ ಸೇರಿಸಿ ಕುದಿಸಿ. ಇದಕ್ಕೆ ಒಣಮೆಣಸನ್ನೂ ಹಾಕಬಹುದು. ಇದೂ ಚೆನ್ನಾಗಿರುತ್ತದೆ.

ಐದನೇ ವಿಧಾನ

ಸೊಪ್ಪನ್ನು ಸ್ವಲ್ಪ ಉಪ್ಪು, ಹುಳಿ, ಬೆಲ್ಲದೊಂದಿಗೆ ಕೊಂಚ ತೊಗರಿಬೇಳೆ ಹಾಕಿ ಬೇಯಿಸಿ. ಚೆನ್ನಾಗಿ ಕರಗುವಂತಾಗಲಿ. ನಂತರ ಕೇವಲ ತೆಂಗಿನಕಾಯಿ ಮತ್ತು ನಾಲ್ಕು ಒಣಮೆಣಸು ಸೇರಿಸಿ ರುಬ್ಬಿ. ಆ ಮಿಶ್ರಣವನ್ನು ಬೆಂದ ಸೊಪ್ಪಿನೊಂದಿಗೆ ಬೆರೆಸಿ ಕುದಿಸಿ. ಇದೂ ಬಹಳ ಚೆನ್ನಾಗಿರುತ್ತೆ. ಮುದ್ದೆ ಇತ್ಯಾದಿಗಳಿಗೆ ರುಚಿ.

ಟಿಪ್ಸ್

* ಸೊಪ್ಪು ಯಾವಾಗಲೂ ಚಪ್ಪೆ ಚಪ್ಪೆ ಇರುತ್ತದೆ. ಹಾಗಾಗಿ ಉಪ್ಪು, ಹುಳಿ, ಬೆಲ್ಲ ಒಟ್ಟಿಗೇ ಹಾಕಿ ಬೇಯಿಸಿದರೆ ಸೊಪ್ಪು ಅವೆಲ್ಲವನ್ನೂ ಹೀರಿಕೊಂಡು ಬೇಯುತ್ತೆ. ತಿನ್ನಲೂ ರುಚಿ

* ತರಕಾರಿಗಳನ್ನು ಬೇಯಿಸುವಾಗ ಉಪ್ಪು, ಹುಳಿ ಹಾಕಿದರೆ ಬೇಗ ಬೇಯೊಲ್ಲ ಎನ್ನುವ ಮಾತಿದೆ. ಅದು ಸೊಪ್ಪಿಗೆ ಅನ್ವಯಿಸದು.

* ಬೆಳ್ಳುಳ್ಳಿ ಒಗ್ಗರಣೆ ಕೊಡುವುದಕ್ಕೆ ಒಂದು ಕಾರಣವಿದೆ. ಸೊಪ್ಪು ಶೀತವಾಯು ಗುಣವುಳ್ಳದ್ದು. ಅದಕ್ಕೆ ಬೆಳ್ಳುಳ್ಳಿಯ ಒಗ್ಗರಣೆ ಕೊಟ್ಟರೆ ಶೀತವಾಯುವಿನಿಂದ ಉಂಟಾಗುವ ತೊಂದರೆಯನ್ನು ತಪ್ಪಿಸಿಕೊಳ್ಳಬಹುದು. ಹಾಗೆಯೇ ಶುಂಠಿ ಬಳಸುವುದೂ ಅದಕ್ಕೇ.

* ಸದಾ ಸೊಪ್ಪಿನ ಹುಳಿಗೆ ತೊಗರಿ ಬೇಳೆ ಬೇಕೆಂದೇನೂ ಇಲ್ಲ. ಅದಿಲ್ಲದೆಯೂ ಮಾಡಬಹುದು.

* ಇದೇ ರೀತಿ ಹುಳಿದ ಸೊಪ್ಪುಗಳ ಹುಳಿಯನ್ನೂ ಮಾಡಬಹುದು. ಹುಳಿಸೊಪ್ಪು ಎಂದೇ ಮಾರುಕಟ್ಟೆಯಲ್ಲಿ ಸಿಗುತ್ತದೆ. ಅದನ್ನು ಬೇಯಿಸುವಾಗ ಮತ್ತೆ ಹುಳಿ ಹಾಕುವ ಅಗತ್ಯವಿಲ್ಲ.

ಎರಡು ಬಗೆಯ ಅನ್ನಗಳು

2010-03-10T09:32:00.000-08:00

ಬಹಳ ದಿನಗಳಾಗಿತ್ತು ಹೊಸ ತಿಂಡಿ ಅಥವಾ ಪದಾರ್ಥ ಬರೆಯದೇ. ಯಾವುದ್ಯಾವುದೋ ಕೆಲಸದ ಒತ್ತಡ. ಬಂದವರೆಲ್ಲಾ ಏನಾದ್ರೂ ಹಾಕಿ ಎಂದು ಆಗ್ರಹಿಸುತ್ತಲೇ ಇದ್ದಾರೆ. ಹೇಗಾದರೂ ಮಾಡಿ ಬ್ಲಾಗ್ ಅನ್ನು ಸಕ್ರಿಯಗೊಳಿಸಬೇಕು ಇಲ್ಲವೇ ಮುಚ್ಚಿಬಿಡಬೇಕು ಎಂದು ಆಲೋಚಿಸುತ್ತಿದ್ದೇನೆ. ಎರಡೂ ಆಗುತ್ತಿಲ್ಲ. ಇನ್ನು ಮುಂದಾದರೂ ಬ್ಲಾಗ್ ನ್ನು ಸಕ್ರಿಯಗೊಳಿಸಲು ಮೊದಲಿಗೆ ಪ್ರಯತ್ನಿಸುತ್ತೇನೆ, ಇಲ್ಲವಾದರೆ ಮುಚ್ಚಿ ಬಿಡುತ್ತೇನೆ.

ನಮ್ಮ ಬ್ಯಾಚುಲರ್ ಗಳದ್ದೇ ಕಷ್ಟ. ಅದಕ್ಕಾಗಿ ಬಹಳ ದಿನಗಳಾದ ಮೇಲೆ ಬ್ಯಾಚುಲರ್ ಗಳಿಗೆ ಸುಲಭವಾಗೋ ಐಟಂ ಬರೀತಾ ಇದ್ದೇನೆ. ಸಾಮಾನ್ಯವಾಗಿ ಯಾವಾಗಲೂ ಚಿತ್ತಾನ್ನ ಮಾಡಿಯೋ, ಹೋಟೆಲ್ ನಿಂದ ಸಾಂಬಾರ್ ತಂದೋ ಬಹಳ ಬೇಸರವಾಗಿರುತ್ತೆ. ಅದಕ್ಕಾಗಿ ಮೂರು ತರಹದ ಅನ್ನಗಳನ್ನು ಹೇಳುತ್ತೇನೆ. ಬಹಳ ಕಷ್ಟವಾಗೋಲ್ಲ,ಇರೋ ಸಾಮಾನುಗಳಲ್ಲೇ ಮಾಡಬಹುದು. ಒಂದುವೇಳೆ ಒಂದು ಸಾಮಾನು ಇರದೇ ಇದ್ದರೂ ತಲೆ ಹೋಗುವಂಥ ರುಚಿಯೇನೋ ಕಡಿಮೆ ಆಗೋದಿಲ್ಲ.

ತೆಂಗಿನಕಾಯಿ ಚಿತ್ರಾನ್ನ(Coconut Rice Bath)

ಹೇಗಿದ್ರೂ ಅನ್ನವನ್ನು ಕುಕ್ಕರ್ ನಲ್ಲಿಟ್ಟು ಮಾಡಿಬಿಡ್ತೀರಿ. ಆಮೇಲೆ ಅನ್ನ ತೆಗೆದು ಊಟದ ತಟ್ಟೆಯಲ್ಲಿ ಆರಲು ಬಿಡಿ. ಮೂರು ಹಸಿಮೆಣಸಿನಕಾಯಿಯನ್ನು ಸೀಳಿಟ್ಟುಕೊಳ್ಳಿ, ಕರಿಬೇವಿನ ಸೊಪ್ಪು ಜತೆಗಿರಲಿ. ಮೂರು ಮಂದಿ ಇದ್ದರೆ, ಒಂದು ಅರ್ಧ ತೆಂಗಿನಕಾಯಿ ತುರಿದು ಇಟ್ಟುಕೊಳ್ಳಿ.

ಒಗ್ಗರಣೆಗೆ ಬಾಣಲಿಯನ್ನು ಒಲೆ ಮೇಲಿಟ್ಟು, ಬೆಂಕಿ ಹಚ್ಚಿ ಸ್ವಲ್ಪ ಎಣ್ಣೆ ಹಾಕಿ. ಅದು ಕಾಯುತ್ತಿದ್ದಂತೆ ಸ್ವಲ್ಪ ಸಾಸಿವೆ ಹಾಕಿ, ಪಟ ಪಟ ಎಂದು ಸಿಡಿಯುತ್ತಿದ್ದಂತೆ ಸ್ವಲ್ಪವೇ ಸ್ವಲ್ಪ (ಹತ್ತಿಪ್ಪತ್ತು ಕಾಳು) ಉದ್ದಿನಬೇಳೆ, ಕಡ್ಲೆಬೇಳೆಯನ್ನು ಹಾಕಿ, ಕೆಂಪಗಾಗುವಂತೆ ಹುರಿಯಿರಿ. ನಂತರ ಹದಿನೈದು ಕಾಳು ಜೀರಿಗೆ ಹಾಕಿ. ಹಸಿಮೆಣಸಿನಕಾಯಿ, ಕರಿಬೇವಿನಸೊಪ್ಪು ಹಾಕಿ. ನಂತರ ತುರಿದ ತೆಂಗಿನಕಾಯಿ ಹಾಕಿ, ಉಪ್ಪು ಹಾಕಿ ಸೌಟಿನಿಂದ ತಿರುವಿರಿ. ಇಂಗಿನ ಪುಡಿ ಇದ್ದರೆ ಚೂರು ಹಾಕಿ, ನಂತರ ತಣ್ಣಗಾದ ಅನ್ನ ಹಾಕಿ ಕಲಸಿ. ಕೊನೆಗೆ ಲಿಂಬೆಹಣ್ನಿನ ರಸ ಚಿಮುಕಿಸಿ ಮತ್ತೊಮ್ಮೆ ಕಲಸಿ. ಕೊತ್ತಂಬರಿ ಸೊಪ್ಪನ್ನು ಸಣ್ಣಗೆ ಕತ್ತರಿಸಿ ಮೇಲಕ್ಕೆ ಹಾಕಿ ಅಲಂಕಾರ ಮಾಡಬಹುದು. ಇದು ತಿನ್ನಲಿಕ್ಕೆ ರುಚಿ, ಮಾಡಲಿಕ್ಕೂ ಸುಲಭ. ಬೇಕೆನ್ನುವವರು ಎರಡು ಈರುಳ್ಳಿಯನ್ನೂ ಸಣ್ಣಗೆ ಕತ್ತರಿಸಿ ಹಸಿಮೆಣಸಿನಕಾಯಿ ಹಾಕಿದ ಮೇಲೆ ಹುರಿದು ಬಳಸಬಹುದು.

ಬೇಕಾಗೋ ಸಾಮಾನು

ಒಗ್ಗರಣೆಗೆ ಸಾಸಿವೆ, ಜೀರಿಗೆ, ಉದ್ದಿನಬೇಳೆ, ಕಡ್ಲೇಬೇಳೆ

ಹಸಿಮೆಣಸಿನಕಾಯಿ ಮೂರು

ಕರಿಬೇವಿನಸೊಪ್ಪು ಮೂರು ಎಸಳು

ಸ್ವಲ್ಪ ಕೊತ್ತಂಬರಿ ಸೊಪ್ಪು

ಲಿಂಬೇಹಣ್ಣು 1

ಉಪ್ಪು ಸ್ವಲ್ಪ

ಬೇಕಾದರೆ ಇಂಗು

ದೊಡ್ಡಮೆಣಸು ಚಿತ್ರಾನ್ನ

ಮೂರು ಕ್ಯಾಪ್ಸಿಕಂ (ದೊಡ್ಡ ಮೆಣಸು) ನ್ನು ಉದ್ದವಾಗಿ ಕತ್ತರಿಸಿಟ್ಟುಕೊಳ್ಳಿ. ಉದಾಹರಣೆಗೆ ಚೈನೀ ಡಿಷಸ್ ನಲ್ಲಿ ಕತ್ತರಿಸುವ ಹಾಗೆ. ಸ್ವಲ್ಲ ತೆಳ್ಳಗೆ ಕತ್ತರಿಸಿ, ದಪ್ಪ ಇದ್ದರೆ ಬೇಗೆ ಫ್ರೈ ಆಗೋದಿಲ್ಲ. ಎರಡು ಈರುಳ್ಳಿಯನ್ನು ಅದೇ ತರಹ ಉದ್ದುದ್ದವಾಗಿ ಕತ್ತರಿಸಿಟ್ಟುಕೊಳ್ಳಿ. ಒಂದು ಟೊಮೆಟೋ ಅಥವಾ ಅರ್ಧ ಲಿಂಬೆಹಣ್ಣು ಸಿದ್ಧಪಡಿಸಿಟ್ಟುಕೊಳ್ಲಿ.

ನಿಮಗೆ ಬೇಕಾದಷ್ಟು ಅನ್ನವನ್ನು ಮಾಡಿಟ್ಟುಕೊಂಡು, ಬಟ್ಟಲಲ್ಲಿ ಹಾಕಿ ತಣ್ಣಗೆ ಮಾಡಿಟ್ಟುಕೊಳ್ಳಿ. ನಂತರ ಬಾಣಲೆ ಒಲೆ ಮೇಲಿಟ್ಟು, ಒಗ್ಗ್ರರಣೆಗೆ ಸಾಸಿವೆ, ಉದ್ದಿನಬೇಳೆ, ಕಡ್ಲೆಬೇಳೆ ಹಾಕಿ ಹುರಿಯಿರಿ. ನಂತರ ಈರುಳ್ಳಿ ಹಾಕಿ, ಸ್ವಲ್ಪ ಕೆಂಪಗಾಗುತ್ತಿದ್ದಂತೆ ಕ್ಯಾಪ್ಸಿಕಂನ್ನು ಹಾಕಿ ಹುರಿಯಿರಿ. ಅರ್ಧ ಚಮಚ ಆರಿಶಿನ ಪುಡಿ ಹಾಕಿ. ತಕ್ಷಣವೇ ಉಪ್ಪು ಹಾಕಿ, ಅರ್ಧ ಚಮಚದಷ್ಟು ಸಕ್ಕರೆ ಹಾಕಿ. ಸ್ವಲ್ಪ ಚೆನ್ನಾಗಿ ಹುರಿಯಿರಿ, ನಂತರ ಸ್ವಲ್ಪ ತೆಂಗಿನಕಾಯಿ ಹಾಕಿ, ಅನ್ನ ಹಾಕಿ ಕಲಸಿ, ಲಿಂಬೆಹಣ್ಣಿನ ರಸ ಹಾಕಿ ಮತ್ತೊಮ್ಮೆ ಕಲಸಿ, ಕತ್ತರಿಸಿದ ಕೊತ್ತಂಬರಿ ಸೊಪ್ಪು ಹಾಕಿ ಸಿಂಗರಿಸಿ.

ಲಿಂಬೆಹಣ್ಣಿನ ಬದಲು ಟೊಮೆಟೋ ಹಣ್ಣನ್ನು ಹಾಕುವವರು, ಈರುಳ್ಳಿ, ಕ್ಯಾಪ್ಸಿಕಂ ಹಾಕಿದ ತಕ್ಷಣ ಕತ್ತರಿಸಿಟ್ಟ ಟೊಮೆಟೋ ಹಣ್ಣನ್ನು ಹಾಕಿ ಹುರಿಯಬೇಕು.

ಬೇಕಾಗೋ ಸಾಮಾನು

ಮೂರು ದೊಡ್ಡ ಮೆಣಸು

ಎರಡು ಈರುಳ್ಳಿ

ಒಂದು ಟೊಮೆಟೋ ಅಥವಾ ಅರ್ಧ ಲಿಂಬೆಹಣ್ಣು

ಕಾಲು ತುರಿದ ತೆಂಗಿನಕಾಯಿ

ಒಗ್ಗರಣೆಗೆ ಸಾಸಿವೆ, ಉದ್ದಿನಬೇಳೆ, ಕಡ್ಲೆಬೇಳೆ

* ಇದಕ್ಕೆ ಕಡ್ಲೇಬೀಜ ಹಾಕಬೇಡಿ. ಕಾರಣ, ಈರುಳ್ಳಿ, ಕ್ಯಾಪ್ಸಿಕಂ, ಟೊಮೆಟೋ ಹುರಿಯುವಾಗ ನೀರಿನ ಅಂಶ ಬಿಡುತ್ತದೆ. ಆಗ ಹುರಿದ ಕಡ್ಲೆಬೀಜ ಅದರಲ್ಲಿ ನೆನೆದಂತಾಗಿ ಮೆದು ಆಗುತ್ತದೆ.ತಿನ್ನಲು ರುಚಿ ಇರದು.

* ಟೊಮೆಟೋ, ಲಿಂಬೆಹಣ್ಣು ಎರಡನ್ನೂ ಬಳಸಬೇಡಿ. ಯಾಕೆಂದರೆ ಕ್ಯಾಪ್ಸಿಕಂನದ್ದೇ ಹುಳಿಯ ಗುಣ. ಇದರೊಂದಿಗೆ ಇವೆರಡನ್ನೂ ಹಾಕಿದರೆ, ಜಾಸ್ತಿ ಹುಳಿಯಾದೀತು.

* ಒಗ್ಗರಣೆಗೆ ಜೀರಿಗೆ ಹಾಕಬೇಡಿ. ಜೀರಿಗೆಗೆ ಕಹಿಗುಣವಿದೆ, ಅದು ಕ್ಯಾಪ್ಸಿಕಂನ ಒಗರು ರುಚಿಯೊಂದಿಗೆ ಸೇರಿ ಸ್ವಲ್ಪ ಕಷ್ಟವೆನಿಸಬಹುದು ತಿನ್ನಲು.

ಪಡುವಲಕಾಯಿ ಸಾಸಿವೆ

2009-12-03T23:21:00.000-08:00

ನನ್ನ ಪಾಕಚಂದ್ರಿಕೆ ಬ್ಲಾಗ್ ಇಲ್ಲಿಗೆ ಸ್ಥಳಾಂತರಿಸಿದ ಮೇಲೆ ಹೊಸ ಪೋಸ್ಟ್ ಹಾಕಿರಲಿಲ್ಲ. ಇದೇ ಹೊಸತು. ಇನ್ನು ಮುಂದೆ ನಿರಂತರವಾಗಿ ವಾರಕ್ಕೆ ಎರಡಾದರೂ ಪೋಸ್ಟ್ ಹಾಕುವ ಪ್ರತಿಜ್ಞೆ ನನ್ನದು.

ಪಡುವಲಕಾಯಿ ಸಾಸಿವೆ (ದಕ್ಷಿಣ ಕನ್ನಡದಲ್ಲಿ ಸಾಸಿಮೆ ಎನ್ನುವುದುಂಟು) ಬಹಳ ಸುಲಭ. ಗರಿಷ್ಠ ಅಂದ್ರೆ ಮಾಡೋಕೆ ಹತ್ತು ನಿಮಿಷ ಹಿಡಿಯಬಹುದು. ಜತೆಗೆ ಮಧ್ಯಾಹ್ನದ ಊಟಕ್ಕೆ ಬಹಳ ಚೆಂದ.

ನಿತ್ಯವೂ ಬೇಳೆ-ಕಾಳು ತಿಂದು ಬೇಜಾರಾಗಿದ್ರೆ ಇದನ್ನು ಮಾಡಬಹುದು. ಪಡುವಲಕಾಯಿ ತಂದು ಪಲ್ಯ ಮಾಡಿರ್ತೀರಿ. ಬರೀ ಪಲ್ಯದಲ್ಲಿ ಊಟ ಮಾಡೋದು ಕಷ್ಟ. ಅನ್ನ ಗಂಟಲ ಕೆಳಗಿಳಿಯೋಕೆ ಕಷ್ಟ ಎನಿಸಬಹುದು. ಆಗ ಇಂಥದೊಂದು ಮೇಲೋಗರ ಮಾಡಿಕೊಂಡ್ರೆ ಎಲ್ಲವೂ ಸಲೀಸು.

ಮತ್ತೆ ಇದಕ್ಕೆ ಪಡುವಲಕಾಯಿ ಹೆಚ್ಚು ಬೇಕೆಂದೇನೂ ಇಲ್ಲ. ಪಡುವಲಕಾಯಿ ಪಲ್ಯಕ್ಕೆ ಕತ್ತರಿಸುವಾಗ ಅದರೊಳಗಿನ ತಿರುಳನ್ನು ತೆಗೆದು ಎಸೆಯುತ್ತಾರೆ ಸಾಮಾನ್ಯವಾಗಿ. ಅದನ್ನು ಎಸೆಯೋ ಬದಲು ತೆಗೆದಿಡಿ. ನಂತರ ಒಲೆ ಮೇಲೆ ಸಣ್ಣಗೆ ಉರಿ ಹಚ್ಚಿ, ಸಣ್ಣ ಪಾತ್ರೆಯಲ್ಲಿ ಸ್ವಲ್ಪ ನೀರು ಹಾಕಿ ಆ ತಿರುಳನ್ನು ಬೇಯಲು ಹಾಕಿ. ಐದು ನಿಮಿಷದಲ್ಲಿ ಅದನ್ನು ಬೇಯುತ್ತದೆ.

ನಂತರ ಸ್ವಲ್ಪ ತೆಂಗಿನ ತುರಿ, ಒಂದೆರಡು ಹಸಿಮೆಣಸು (ನಿಮಗೆ ಖಾರ ಎಷ್ಟು ಬೇಕೋ ಅದಕ್ಕೆ ತಕ್ಕಂತೆ) ಇಲ್ಲದಿದ್ದರೆ ಎರಡು ಒಣಮೆಣಸು, ಸ್ವಲ್ಪವೇ (ಒಂದು ಟೀ ಚಮಚದಷ್ಟು) ಸಾಸಿವೆಯನ್ನು ಹಾಕಿ ಒಟ್ಟಿಗೆ ರುಬ್ಬಿರಿ. ಅಲ್ಲಿಗೆ ಪಡುವಲಕಾಯಿ ಸಾಸಿವೆ ರೆಡಿ. ನಂತರ ಸ್ವಲ್ಪ ಮೊಸರು ಅಥವಾ ಮಜ್ಜಿಗೆ ಯನ್ನು ಬೆರೆಸಿ. ಇಂಗಿನ ಒಗ್ಗರಣೆ ಕೊಡಿ. ಒಗ್ಗರಣೆ ಹಾಕುವಾಗ ಸ್ವಲ್ಪ ತಾಜಾ ಕರಿಬೇವಿನ ಸೊಪ್ಪನ್ನು ತುಂಡು ಮಾಡಿ ಹಾಕಿ. ಅದರ ರುಚಿ ಹೆಚ್ಚುತ್ತದೆ.

ಗಮನಿಸಬೇಕಾದ ಅಂಶವೆಂದರೆ ತಿರುಳಿನಲ್ಲಿ ಬೀಜದ ಅಂಶವೂ ಇರುವುದರಿಂದ, ಪಡುವಲಕಾಯಿ ಎಳತು ಇದ್ದಷ್ಟೂ ಒಳ್ಳೆಯದು, ಒಳ್ಳೆ ರುಚಿ. ಇಷ್ಟು ಮಾಡಲು ಬೇರೇನೂ ಸರ್ಕಸ್ ಮಾಡಬೇಕಾಗಿಲ್ಲ.

ಅಕ್ಕಿ ರೊಟ್ಟಿ ಹೀಗೆ ಮಾಡಿ ನೋಡಿ

2009-08-27T04:32:00.000-07:00

ಅಕ್ಕಿ ರೊಟ್ಟಿ
ಬಹಳಷ್ಟು ಮಂದಿಗೆ ಅಕ್ಕಿ ರೊಟ್ಟಿ ಮಾಡುವುದೆಂದರೆ ಬಹಳ ರಿಸ್ಕ್. ಅದರರ್ಥ ಬಹಳ ಸಮಯ ಹಿಡಿಯುವ ಕೆಲಸ. ಜತೆಗೆ ರೊಟ್ಟಿ ತೆಳ್ಳಗೆ ನ್ಯೂಸ್ ಪೇಪರ್‌ನಂತೆ ಬಂದರೆ ತಿನ್ನಲಿಕ್ಕೆ ಚೆಂದ. ದಪ್ಪ ಆಗಿಬಿಟ್ಟರೆ ತಿನ್ನಲಿಕ್ಕೆ ಕಷ್ಟ. ಹೀಗೇ ನಾನಾ ಸಮಸ್ಯೆಗಳು.
ಇದರ ಮಧ್ಯೆ ಮತ್ತಷ್ಟು ಕಾಡುವ ಸಮಸ್ಯೆಯೆಂದರೆ ರೊಟ್ಟಿ ತಟ್ಟೋದು ಹೇಗೆ ? ಬಾಳೆ ಎಲೆ ಮೇಲೆ ತಟ್ಟಿದ್ರೆ ಹೇಗೆ ? ನಂದಿನ ಹಾಲಿನ ಕವರ್ ಒಡೆದು ಅಗಲಮಾಡಿ ಅದರ ಮೇಲೆ ತಟ್ಟಿದ್ರೆ, ಹಾಗೆಯೇ ಕಾವಲಿ ತಣ್ಣಗೆ ಆಗುವವರೆಗೆ ಕಾದ ಮೇಲೆ ಅದರಲ್ಲೇ ತಟ್ಟಿದರೆ ಹೇಗೆ…ಇಂಥ ಹಲವು ಪ್ರಶ್ನೆಗಳಿವೆ.
ನಾವೇ ಕಂಡುಕೊಂಡ ಸುಲಭ ವಿಧಾನ ಈಗ ಹೇಳುತ್ತಿದ್ದೇನೆ. ನೋಡಿ, ಪ್ರಯತ್ನ ಪಡಿ. ನಿಜವಾಗಲೂ ಬಹಳ ಸುಲಭವಾದದ್ದು ಹಾಗೂ ಬೇಗ ಆಗುವಂಥದ್ದು.
ಸಾಮಾನು ವಿವರ (ಮೂರ್ನಾಲ್ಕು ಮಂದಿಗೆ ಪ್ರಮಾಣ)
ಮುಕ್ಕಾಲು ಕೆ. ಜಿ. ಅಕ್ಕಿಹಿಟ್ಟು, ಒಂದು ಹಿಡಿ ಚಿರೋಟಿ ರವೆ, ನಾಲ್ಕು ಈರುಳ್ಳಿ, ನಾಲ್ಕು ಹಸಿಮೆಣಸು, ಕರಿಬೇವಿನ ಸೊಪ್ಪು, ಕೊತ್ತಂಬರಿ ಸೊಪ್ಪು, ಸಣ್ಣ ತುಂಡು ಶುಂಠಿ, ಕೊಂಚ ಬಿಳಿ ಎಳ್ಳು, ತೆಂಗಿನತುರಿ, ಸ್ವಲ್ಪ ಮಜ್ಜಿಗೆ ಅಥವಾ ಮೊಸರು, . ಇದು ಮೂಲ ವಸ್ತುಗಳು.
ಇದಲ್ಲದೇ, ಇದಕ್ಕೆ ಕ್ಯಾರೆಟ್, ಸ್ವಲ್ಪ ಕೋಸು, ಬೀನ್ಸ್ ಹೀಗೆ ಹಲವು ತರಕಾರಿಗಳನ್ನು ಸಣ್ಣಗೆ ಹೆಚ್ಚಿ ಅಥವಾ ತುರಿದು ಹಾಕಲೂಬಹುದು.

ಅರ್ಚನಾ ಕಳುಹಿಸಿದ ಚಿತ್ರ

ಈರುಳ್ಳಿಯನ್ನು ಸಣ್ಣಗೆ ತುಂಡು ಮಾಡಿಕೊಳ್ಳಿ. ಶುಂಠಿಯೂ ಸಣ್ಣಗಾಗಬೇಕು. ನಂತರ ಕೊತ್ತಂಬರಿ ಸೊಪ್ಪು, ಕರಿಬೇವಿನಸೊಪ್ಪು, ಹಸಿಮೆಣಸಿನ ತುಂಡುಗಳನ್ನು ಒಂದು ಪಾತ್ರೆಗೆ ಹಾಕಿಕೊಳ್ಳಿ. ಅರ್ಧ ತೆಂಗಿನಕಾಯಿಯನ್ನು ತುರಿದು ಹಾಕಿಕೊಳ್ಳಿ. ಬೇಕಾದಷ್ಟು ಉಪ್ಪು ಹಾಕಿ. ಮೂರು ಚಮದಷ್ಟು ಬಿಳಿ ಎಳ್ಳನ್ನೂ ಹಾಕಿ ಕಲಸಿಕೊಳ್ಳಿ. ಸ್ವಲ್ಪ ನಾದುವಂತೆ ತಿಕ್ಕಿಕೊಳ್ಳಿ. ನಂತರ ಅದಕ್ಕೆ ಮುಕ್ಕಾಲುಕೆಜಿ ಅಕ್ಕಿ ಹಿಟ್ಟು ಹಾಕಿಕೊಳ್ಳಿ. ಒಂದು ಮುಷ್ಟಿಯಷ್ಟು ಚಿರೋಟಿ ರವೆ (ಕೇಸರಿಬಾತು ರವೆ) ಹಾಕಿಕೊಳ್ಳಿ. ಒಂದು ಚಿಕ್ಕ ಲೋಟದಷ್ಟು ಮಜ್ಜಿಗೆ ಅಥವಾ ಮೊಸರನ್ನು ಹಾಕಿ ಗಟ್ಟಿಯಾಗಿ ಕಲೆಸಿಕೊಳ್ಳಿ. ಅಲ್ಲಿಗೆ ಹಿಟ್ಟು ಸಿದ್ಧ. ಐದು ನಿಮಿಷ ಹಾಗೆಯೇ ಮುಚ್ಚಿಡಿ.
ತಟ್ಟುವ ವಿಧಾನ
ರೊಟ್ಟಿ ತಟ್ಟೆಗೆ ಎಣ್ಣೆ ಹಚ್ಚಿಕೊಳ್ಳಿ. ಅದಕ್ಕೆ ಒಂದು ಉಂಡೆ ಹಿಟ್ಟನ್ನು ಹಿಟ್ಟು ಕೈಯಲ್ಲೇ ತಟ್ಟುತ್ತಾ ಹೋಗಿ. ಬೇಕಾದರೆ ಕೈ ಬೆರಳಿಗೆ ಸ್ವಲ್ಪ ಎಣ್ಣೆ ಮುಟ್ಟಿಕೊಂಡರೆ ಚೆನ್ನಾಗಿ ತಟ್ಟಬಹುದು. ಅದನ್ನು ಒಲೆಯ ಮೇಲಿಟ್ಟು, ಎರಡು ಚಮಚ ಎಣ್ಣೆ ಹಾಕಿ ಕಾಯಿಸಿ. ಸಣ್ಣಗಿನ ಕಾವಿನಲ್ಲೇ ಬೆಂದರೆ, ಒಳ್ಳೆ ಕೆಂಪಗಾಗುತ್ತದೆ. ಅಲ್ಲಿಗೆ ರೊಟ್ಟಿ ತಿನ್ನಲು ಸಿದ್ಧ
ಸುಲಭ ವಿಧಾನ
ಬಾಳೆ ಎಲೆಯಲ್ಲಿ ತಟ್ಟಿ ಕಾವಲಿಗೆ ಹಾಕಿ, ಸ್ವಲ್ಪ ಬಿಸಿಯಾಗುತ್ತಿದ್ದಂತೆ ಆ ಎಲೆಯನ್ನು ಮೆಲ್ಲಗೆ ತೆಗೆದು ಮತ್ತೆ ಹೊಸ ರೊಟಿಯನ್ನು ತಟ್ಟಬಹುದು. ಆದರೆ ಮೂರ‍್ನಾಲ್ಕು ರೊಟ್ಟಿ ತಟ್ಟಿದ ನಂತರ ಆ ಎಲೆ ಬಿಸಿ ತಾಗಿ, ತಾಗಿ ಮುದುಡುತ್ತದೆ. ಆಗ ರೊಟ್ಟಿ ಆಕಾರ ಸಣ್ಣದಾಗುತ್ತಾ ಹೋಗುತ್ತದೆ.
ಇನ್ನು ಸ್ವಲ್ಪ ದಪ್ಪಗಿನ ಪ್ಲಾಸ್ಟಿಕ್ ಹಾಳೆಯಲ್ಲಿ ರೊಟ್ಟಿ ತಟ್ಟಿದರೂ, ಅದು ಬಿಸಿಯ ಶಾಖಕ್ಕೆ ಸುತ್ತಲೆಲ್ಲಾ ಕರಗುತ್ತಾ ಹೋಗುತ್ತದೆ. ಕೆಟ್ಟ ವಾಸನೆ, ಅದು ರೊಟ್ಟಿಯ ಹಿಟ್ಟಿನ ಜತೆಗೆ ಸೇರಲೂ ಬಹುದು. ಅದೂ ಬೇಡ.
ಕಾವಲಿಯನ್ನೇ ತಣ್ಣಗೆ ಮಾಡಿ ರೊಟ್ಟಿ ತಟ್ಟುವುದಾದರೆ, ಸಮಯವೂ ಪೋಲು, ಜತೆಗೆ ಗ್ಯಾಸ್ ಪೋಲು. ಯಾಕೆಂದರೆ, ಪ್ರತಿ ಬಾರಿಯೂ ಕಾವಲಿ ತಣ್ಣಗಾಗಲು ಐದು ನಿಮಿಷ ಬೇಕು. ನಂತರ ರೊಟ್ಟಿ ತಟ್ಟಿ ಒಲೆಗೆ ಇಟ್ಟರೆ, ಆ ಕಾವಲಿ ಕಾಯಲಿಕ್ಕೆ ಮತ್ತೆ ಹತ್ತು ನಿಮಿಷ ಬೇಕು. ಇದು ನ್ಯಾಷನಲ್ ವೇಸ್ಟ್
ಹಾಗಾದರೆ ಮಾಡೋದು ಹೇಗೆ
ಮಾರುಕಟ್ಟೆಯಲ್ಲಿ ಅಲ್ಯುಮಿನಿಯಂ, ಇಂಡಾಂಲಿಯಂ ತಟ್ಟೆ ಸಿಗುತ್ತದೆ. ದುಂಡಗಿರುವಂಥ ತಟ್ಟೆ. ಇವು ಜೈಲು ತಟ್ಟೆ ಎಂದೇ ಪ್ರಸಿದ್ಧ. ೨೦ ರಿಂದ ೩೦ ರೂ. ನ ತಟ್ಟೆ. ಸಿನಿಮಾಗಳಲ್ಲಿ ಕೈದಿಗಳು ಹಿಡಿದಿರುವ ತಟ್ಟೆಗಳನ್ನು ನೋಡಿರಬಹುದು. ಅಂಥ ಎರಡು ತಟ್ಟೆಯನ್ನು ತಂದಿಟ್ಟುಕೊಳ್ಳಿ. ಇವು ಮುಚ್ಚಳದ ಮಾದರಿಯಲ್ಲಿರುವುದಿಲ್ಲ, ಗಮನಿಸಿ. ನಾನು ಹೇಳುತ್ತಿರುವ ತಟ್ಟೆ, ಸ್ವಲ್ಪ ಗುಂಡಿಯಂತಿರುತ್ತದೆ. ಬೆಂಗಳೂರಿನಲ್ಲಾದ್ರೆ, ಕೆ. ಆರ್. ಮಾರುಕಟ್ಟೆಯಲ್ಲಿ ಲಭ್ಯ.

ತಟ್ಟೆಯ ಮಾದರಿ ಚಿತ್ರ, ಇನ್ಣೂ ಸ್ವಲ್ಪ ಗುಂಡಿಯಂತಿರುತ್ತದೆ.

ಹೊಸ ತಟ್ಟೆಗೆ ಹಿಂದಿನ ದಿನವೇ ಕೊಂಚ ಎಣ್ಣೆ ಸವರಿಡಿ. ಬೆಳಗ್ಗೆ ಹಿಟ್ಟು ಕಲಸಿದ ಮೇಲೆ ಒಂದು ತಟ್ಟೆಗೆ ಹಿಟ್ಟು ಹಾಕಿ ತೆಳ್ಳಗೆ (ಎಷ್ಟು ಸಾಧ್ಯವೋ ಅಷ್ಟು) ತಟ್ಟಿ, ಬೇಯಿಸಿ. ಪಕ್ಕದಲ್ಲೇ ಒಂದು ದೊಡ್ಟ ಊಟದ ತಟ್ಟೆಯಲ್ಲಿ ಮುಕ್ಕಾಲು ಎನಿಸುವಷ್ಟು ನೀರು ತುಂಬಿಸಿಡಿ. ನಮ್ಮ ರೊಟ್ಟಿ ತಟ್ಟೆಗಿಂತ ಊಟದ ತಟ್ಟೆ ದೊಡ್ಡದಿರಬೇಕು.
ಒಲೆ ಮೇಲಿಟ್ಟ ಹಿಟ್ಟು ಬೆಂದು ಅದನ್ನು ತೆಗೆದ ಕೂಡಲೇ ಆ ತಟ್ಟೆಯನ್ನು ಈ ಊಟದ ತಟ್ಟೆಯ ನೀರಿನ ಮೇಲೆ ತೇಲಲು ಬಿಡಿ. ಹತ್ತು ಸೆಕೆಂಡುಗಳಲ್ಲಿ ಅದು ತಣ್ಣಗಾಗುತ್ತದೆ. ತಕ್ಷಣವೇ ರೊಟ್ಟಿ ಹಿಟ್ಟು ಹಚ್ಚಿ ಮತ್ತೆ ಬೇಯಿಸಿ. ಹೀಗೇ, ಕಾದ ರೊಟ್ಟಿ ತಟ್ಟೆಯನ್ನು ತಣ್ಣಗೆ ಮಾಡಿಕೊಂಡು ಸುಲಭ ಮತ್ತು ಬೇಗ ರೊಟ್ಟಿ ಮಾಡಬಹುದು. ಇದರಿಂದ ಗ್ಯಾಸೂ ವೇಸ್ಟಾಗುವುದಿಲ್ಲ, ನೀರೂ ವೇಸ್ಟಾಗುವುದಿಲ್ಲ, ಸಮಯವೂ ಪೋಲಾಗುವುದಿಲ್ಲ.
ಅಂದಹಾಗೆ, ನನಗೆ ಚಿತ್ರ ಕಳುಹಿಸಿಕೊಟ್ಟಿದ್ದು ಅರ್ಚನಾ. ಅವರೂ ರೆಸಿಪಿ ಲೋಕದವರೇ. ಅವರಿಗೆ ಥ್ಯಾಂಕ್ಸ್.
ಗಮನಿಸಬೇಕಾದ ಅಂಶ
* ಬಹಳ ನುಣ್ಣಗಿರುವ ಅಕ್ಕಿ ಹಿಟ್ಟು ಕೊಳ್ಳಬೇಡಿ, ಸ್ವಲ್ಪ ರಫ್ (ರವೆಯಷ್ಟು ಅಲ್ಲ) ಆಗಿರಬೇಕು. ರೊಟ್ಟಿ ಚೆನ್ನಾಗಿ ಬರುತ್ತೆ. ಇನ್ನೊಂದರ್ಥದಲ್ಲಿ ಹೇಳುವುದಾದರೆ ಸ್ವಲ್ಪ ತರಿ-ತರಿ ಇದ್ದರೆ ಚೆನ್ನ
* ಮಜ್ಜಿಗೆ ಹಾಕಿದರೆ ರೊಟ್ಟಿ ಮೃದು ಹಾಗೂ ಪರಿಮಳ ಚೆನ್ನಾಗಿರುತ್ತೆ.
* ಒಲೆಯ ಕಾವು ಹದವಾಗಿರಲಿ, ತಟ್ಟೆ ಸುಡುವಷ್ಟು ಬೇಡ.
* ರೊಟ್ಟಿ ಹಿಟ್ಟು ಗಟ್ಟಿಯಾಗಿರುವಾಗ ತಟ್ಟಲು ಸ್ವಲ್ಪ ಕಷ್ಟವೆನಿಸಬಹುದು. ಆದರೆ ರೊಟ್ಟಿ ರೋಸ್ಟ್ ಆಗಿರುತ್ತೆ. ಅದೇ ಸ್ವಲ್ಪ ನೀರಾಗಿ ಹಿಟ್ಟು ಕಲೆಸಿಕೊಂಡರೆ, ನಾರಿನಂತೆ ರೋಸ್ಟಾಗದು.
* ಈ ರೊಟ್ಟಿಗೆ ಕಾಯಿ ಚಟ್ನಿ ಇದ್ದರೆ ಚೆನ್ನ.